A sinatura do convenio entre as comunidades de Galicia e Andalucía supón un novo paso cara á excelencia educativa, coa innovación en Formación Profesional como un dos piares centrais. Neste acordo, o Centro Galego da Innovación da Formación Profesional Eduardo Barreiros xoga un papel destacado como referente de transferencia de coñecemento e boas prácticas.
En concreto, Galicia porá a disposición de Andalucía o acceso directo á actividade do CGIFP para que coñeza de primeira man os seus programas de investigación e emprendemento, así como o funcionamento dun modelo galego de FP recoñecido polo seu éxito tanto en inserción laboral como no desenvolvemento de competencias.
Durante o acto, o presidente da Xunta, Alfonso Rueda, puxo en valor a evolución da FP galega, destacando que “Galicia duplicou a matrícula en Formación Profesional en dez anos”. Subliñou ademais a importante labor do CGIFP, onde se impulsa un sistema formativo “innovador, práctico e adaptado ás necesidades do mercado laboral”.
Este convenio reafirma a vontade de ambas comunidades por compartir estratexias que melloren a calidade da formación, promovan o talento e potencien un futuro profesional sólido para o alumnado.