Preséntase o proxecto Vetinen, que incorporará as aulas de FP a primeira ferramenta de intelixencia artificial para a aprendizaxe do inglés, tendo en conta a especificidade das diferentes familias profesionais
A pasada semana o conselleiro de Educación, Ciencia, Universidades e FP, Román Rodríguez, presentou no Centro Galego de Innovación da FP Eduardo Barreiros o proxecto educativo Vetinen (Vocational Training Innovative English), que ten como obxectivo incorporar á Formación Profesional galega a primeira ferramenta de intelixencia artificial para que o alumnado poida recrear na aula situacións reais en inglés a través dunha interface en 3D que lles permita interactuar con avatares en distintos escenarios que simulan patróns do día a día.
Román Rodríguez, que estivo acompañado pola directora xeral de FP, Eugenia Pérez, cualificou este proxecto de "innovador e rupturista" na medida en que combina a práctica das destrezas lingüísticas cos últimos avances tecnolóxicos ao servizo da educación. Ademáis, subliñou a potencialidade que ofrece a intelixencia artificial no ámbito educativo na medida en que permite o deseño de recursos didácticos personalizados e a aplicación de metodoloxías innovadoras na aula.
Grazas ao proxecto Vetinen, que se circunscribe á aprendizaxe de idiomas no ámbito da Formación Profesional, os estudantes veranse inmersos nunha serie de situacións e problemáticas personalizadas polos seus profesores coas particularidades correspondentes segundo a familia profesional de que se trate, e ás que deberán enfrontarse en inglés coma se estivesen a vivir unha situación real.