Os docentes do CIFP Carlos Oroza visitan o CGIFP para explorar a Enogastronomía como futuro do sector da restauración
Afrontar os retos da gastronomía e a restauración. Con ese reto acudiron os docentes do CIFP Carlos Oroza de Pontevedra ao CGIFP Eduardo Barreiros para unha xornada na que visitaron as súas instalacións, co obxectivo de explorar as posibilidades de desenvolver proxectos de innovación enogastronómicos. Durante a visita, a Directora do CGIFP, Marta Vázquez Guzmán, foi explicando as distintas áreas de traballo do centro así como as 6 liñas estratéxicas de innovación cara ás que se enfocan os proxectos: biotecnoloxía, Industria 5.0, fabricación aditiva, energia e sustentabilidade ambiental, gastronomía multisensorial e experiencias inmersivas.
Foi na área de gastronomía multisensorial onde se centrou o groso da xornada, buscando sinerxias de colaboración e a posibilidade de desenvolver proxectos de enogastronomía que teñan aplicación práctica no desenvolvemento dos módulos do CIFP Carlos Oroza, e que favorezan a capacitación profesional e a inserción do alumnado no mercado laboral. O laboratorio gastronómico multusensorial, onde se puideron ver os últimos avances no sector gastronómico e hostaleiro e os últimos equipamentos, puxo o colofón á xornada, e serviu como punto de inicio para a colaboración en futuros proxectos de innovación.
