Vetinen

Vetinen é un proxecto pioneiro liderado polo CGIFP que combina realidade virtual inmersiva e intelixencia artificial para mellorar a competencia lingüística do alumnado da Formación Profesional galega en contornos profesionais simulados. Desde a súa posta en marcha, o programa evolucionou continuamente, ampliando familias profesionais, recursos e posibilidades de uso.

Entre as últimas novidades destacan Multiavatar, que permite conversas complexas entre tres personaxes, e IAmentor, unha ferramenta baseada en intelixencia artificial que analiza o progreso do alumnado e propón itinerarios personalizados de aprendizaxe adaptados ao ritmo e nivel de cada estudante.

Tamén se incorporou un novo acceso corporativo para o profesorado, que permite entrar coa conta da Xunta de Galicia. O sistema identifica automaticamente os módulos e grupos de cada docente, simplificando a xestión da aula e reducindo tarefas administrativas, o que reforza o uso pedagóxico de Vetinen.

Na súa primeira fase, Vetinen centrouse na familia de Hostalaría e Turismo, con escenarios simulados de recepción, atención ao cliente e xestión de reservas. Máis tarde incorporouse á familia de Fabricación Mecánica, con simulacións en 3D de inspección de pezas, montaxe e resolución de incidencias industriais.

Na actualidade, Vetinen está implantado en centros de toda Galicia e forma parte do ecosistema de proxectos estratéxicos do CGIFP no marco do Plan FPGal 360, que impulsa a modernización metodolóxica da FP galega e o reforzo das competencias clave, especialmente nas linguas estranxeiras.

De cara aos vindeiros cursos, o CGIFP lidera un plan de implantación progresiva que estenderá Vetinen ao conxunto das familias profesionais da FP galega: no curso 2025-2026 incorporaranse 14 novas familias, con recursos interactivos, un laboratorio de intelixencia artificial e accións de capacitación docente; e no 2026-2027 completarase a extensión ás 26 familias profesionais da FP galega.

Vetinen

Documentos

Presentación VETINEN

1. Recursos interactivos eXeLearning

2. Laboratorio de intelixencia artificial e realidade virtual (LabAiFP)

3. Capacitación específica do profesorado en metodoloxía e ferramentas